ਬੰਗਲਾਦੇਸ਼: ਮਸ਼ਹੂਰ ਰੌਕ ਗਾਇਕ ਜੇਮਸ ਦੇ ਕੰਸਰਟ 'ਤੇ ਹਮਲਾ, ਹਿੰਸਾ ਕਾਰਨ ਪ੍ਰੋਗਰਾਮ ਰੱਦ

ਗੁਆਂਢੀ ਦੇਸ਼ ਬੰਗਲਾਦੇਸ਼ ਵਿੱਚ ਇਸ ਵਕਤ ਹਾਲਾਤ ਬੇਕਾਬੂ ਹਨ, ਜਿੱਥੇ ਹਿੰਸਾ ਦਾ ਦੌਰ ਰੁਕਣ ਦਾ ਨਾਮ ਨਹੀਂ ਲੈ ਰਿਹਾ ਅਤੇ ਘੱਟ ਗਿਣਤੀਆਂ, ਖਾਸ ਕਰਕੇ ਹਿੰਦੂਆਂ ਨੂੰ ਨਿਸ਼ਾਨਾ ਬਣਾਇਆ ਜਾ ਰਿਹਾ ਹੈ। ਇਸੇ ਤਣਾਅਪੂਰਨ ਮਾਹੌਲ ਦੌਰਾਨ, ਮਸ਼ਹੂਰ ਬੰਗਲਾਦੇਸ਼ੀ ਰੌਕ ਗਾਇਕ ਅਤੇ ਗੀਤਕਾਰ ਨਾਗਰ ਬਾਉਲ ਜੇਮਸ (James) ਦੇ ਕੰਸਰਟ ਵਿੱਚ ਹੰਗਾਮੇ ਦੀ ਵੱਡੀ ਘਟਨਾ ਸਾਹਮਣੇ ਆਈ ਹੈ।

ਰਿਪੋਰਟਾਂ ਅਨੁਸਾਰ, ਸ਼ੁੱਕਰਵਾਰ, 26 ਦਸੰਬਰ ਨੂੰ ਫਰੀਦਪੁਰ ਜ਼ਿਲ੍ਹਾ ਸਕੂਲ ਦੀ 185ਵੀਂ ਵਰ੍ਹੇਗੰਢ ਦੇ ਮੌਕੇ 'ਤੇ ਜੇਮਸ ਦਾ ਇੱਕ ਕੰਸਰਟ ਆਯੋਜਿਤ ਕੀਤਾ ਗਿਆ ਸੀ। ਰਾਤ ਕਰੀਬ 9.30 ਵਜੇ ਪ੍ਰੋਗਰਾਮ ਸ਼ੁਰੂ ਹੋਣ ਵਾਲਾ ਸੀ, ਪਰ ਕੁਝ ਲੋਕਾਂ ਦੇ ਸਮੂਹ ਨੇ ਕੰਸਰਟ ਵਿੱਚ ਜ਼ਬਰਦਸਤੀ ਦਾਖਲ ਹੋ ਕੇ ਹਮਲਾ ਕਰ ਦਿੱਤਾ ਅਤੇ ਤੋੜ-ਫੋੜ ਕੀਤੀ, ਜਿਸ ਤੋਂ ਬਾਅਦ ਉੱਥੇ ਅਫਰਾ-ਤਫਰੀ ਦਾ ਮਾਹੌਲ ਬਣ ਗਿਆ।

ਪ੍ਰਬੰਧਕਾਂ ਨੂੰ ਮਜਬੂਰੀ ਵਿੱਚ ਕੰਸਰਟ ਕਰਨਾ ਪਿਆ ਰੱਦ

ਹੰਗਾਮੇ ਦੌਰਾਨ, ਗਾਇਕ ਜੇਮਸ ਕਿਸੇ ਤਰ੍ਹਾਂ ਆਪਣੀ ਜਾਨ ਬਚਾ ਕੇ ਮੌਕੇ ਤੋਂ ਨਿਕਲੇ ਅਤੇ ਪ੍ਰਬੰਧਕੀ ਕਮੇਟੀ ਨੂੰ ਰਾਤ ਕਰੀਬ 10 ਵਜੇ ਕੰਸਰਟ ਰੱਦ ਕਰਨਾ ਪਿਆ।

ਆਯੋਜਨ ਕਮੇਟੀ ਅਨੁਸਾਰ, ਬਾਹਰੀ ਲੋਕਾਂ ਦੇ ਇੱਕ ਸਮੂਹ ਨੂੰ ਦਾਖਲੇ ਤੋਂ ਮਨ੍ਹਾ ਕੀਤੇ ਜਾਣ ਤੋਂ ਬਾਅਦ, ਉਨ੍ਹਾਂ ਨੇ ਜ਼ਬਰਦਸਤੀ ਪ੍ਰੋਗਰਾਮ ਵਾਲੀ ਥਾਂ 'ਤੇ ਦਾਖਲ ਹੋਣ ਦੀ ਕੋਸ਼ਿਸ਼ ਕੀਤੀ। ਜਦੋਂ ਉਨ੍ਹਾਂ ਨੂੰ ਰੋਕਿਆ ਗਿਆ, ਤਾਂ ਉਨ੍ਹਾਂ ਨੇ ਇੱਟਾਂ-ਪੱਥਰ ਸੁੱਟਣੇ ਸ਼ੁਰੂ ਕਰ ਦਿੱਤੇ ਅਤੇ ਸਟੇਜ 'ਤੇ ਕਬਜ਼ਾ ਕਰਨ ਦੀ ਵੀ ਕੋਸ਼ਿਸ਼ ਕੀਤੀ। ਫਰੀਦਪੁਰ ਜ਼ਿਲ੍ਹਾ ਸਕੂਲ ਦੇ ਵਿਦਿਆਰਥੀਆਂ ਨੇ ਇਸ ਹਮਲੇ ਦਾ ਵਿਰੋਧ ਕੀਤਾ।

ਇਵੈਂਟ ਪ੍ਰਚਾਰ ਅਤੇ ਮੀਡੀਆ ਉਪ-ਕਮੇਟੀ ਦੇ ਕਨਵੀਨਰ ਰਾਜੀਬੁਲ ਹਸਨ ਖਾਨ ਨੇ ਦੱਸਿਆ ਕਿ ਹਮਲੇ ਦੌਰਾਨ 15 ਤੋਂ 20 ਸਕੂਲੀ ਵਿਦਿਆਰਥੀ ਜ਼ਖਮੀ ਹੋਏ ਹਨ। ਉਨ੍ਹਾਂ ਕਿਹਾ, “ਅਸੀਂ ਸਾਰੀਆਂ ਤਿਆਰੀਆਂ ਪੂਰੀਆਂ ਕਰ ਲਈਆਂ ਸਨ, ਪਰ ਸਾਨੂੰ ਸਮਝ ਨਹੀਂ ਆ ਰਿਹਾ ਕਿ ਇਹ ਹਮਲਾ ਕਿਸ ਨੇ ਅਤੇ ਕਿਉਂ ਕੀਤਾ।”

ਸੋਸ਼ਲ ਮੀਡੀਆ 'ਤੇ ਫੁੱਟਿਆ ਗੁੱਸਾ

ਇਸ ਘਟਨਾ ਨੂੰ ਲੈ ਕੇ ਸੋਸ਼ਲ ਮੀਡੀਆ 'ਤੇ ਲੋਕਾਂ ਦਾ ਗੁੱਸਾ ਫੁੱਟ ਪਿਆ ਹੈ। ਇੱਕ ਯੂਜ਼ਰ ਨੇ ਟਿੱਪਣੀ ਕਰਦਿਆਂ ਲਿਖਿਆ, "ਇਹ ਸਿਰਫ਼ ਇੱਕ ਕੰਸਰਟ ਨਹੀਂ ਰੁਕਿਆ; ਇਹ ਸੱਭਿਆਚਾਰ, ਆਜ਼ਾਦ ਸੋਚ ਅਤੇ ਕਲਾਤਮਕ ਆਜ਼ਾਦੀ 'ਤੇ ਸਿੱਧਾ ਹਮਲਾ ਸੀ। ਜਦੋਂ ਕਲਾਕਾਰਾਂ ਨੂੰ ਆਪਣੀ ਜਾਨ ਬਚਾਉਣ ਲਈ ਭੱਜਣਾ ਪੈਂਦਾ ਹੈ, ਤਾਂ ਇਹ ਯੂਨੁਸ ਸਰਕਾਰ ਦੀ ਗੰਭੀਰ ਨਾਕਾਮੀ ਨੂੰ ਦਰਸਾਉਂਦਾ ਹੈ।"

ਜ਼ਿਕਰਯੋਗ ਹੈ ਕਿ ਫਰਹਾਦ ਵਹੀਦ ਜੇਮਸ, ਜਿਨ੍ਹਾਂ ਨੂੰ 'ਨਾਗਰ ਬਾਉਲ' ਵਜੋਂ ਜਾਣਿਆ ਜਾਂਦਾ ਹੈ, ਬੰਗਲਾਦੇਸ਼ ਦੇ ਸਭ ਤੋਂ ਮਸ਼ਹੂਰ ਰੌਕ ਗਾਇਕਾਂ ਵਿੱਚੋਂ ਇੱਕ ਹਨ। ਉਹ ਭਾਰਤ ਵਿੱਚ ਵੀ ਬਹੁਤ ਪ੍ਰਸਿੱਧ ਹਨ ਅਤੇ ਉਨ੍ਹਾਂ ਨੇ 'ਗੈਂਗਸਟਰ' ਫਿਲਮ ਦਾ ਗੀਤ ‘ਭੀਗੀ ਭੀਗੀ’ ਸਮੇਤ ਕਈ ਬਾਲੀਵੁੱਡ ਗੀਤ ਗਾਏ ਹਨ।